کوئٹہ: حب اور بلوچستان میں پیٹرول کی نئی قیمت 280 روپے فی لیٹر مقرر کیے جانے کی خبر سوشل میڈیا پر وائرل ہوگئی تاہم حکام نے تاحال اس نوٹیفکیشن کی باضابطہ تصدیق نہیں کی جس کے باعث صورتحال غیر یقینی ہے۔
تفصیلات کے مطابق سوشل میڈیا پر ایک مبینہ نوٹیفکیشن گردش کر رہا ہے جس میں دعویٰ کیا گیا ہے کہ حب سمیت پورے بلوچستان میں پیٹرول کی قیمت 280 روپے فی لیٹر مقرر کی گئی ہے۔
نوٹیفکیشن میں یہ بھی کہا گیا ہے کہ مقررہ قیمت سے زائد قیمت وصول کرنے والوں کے خلاف سخت قانونی کارروائی کی جائے گی جس میں جرمانے اور دیگر سزائیں بھی شامل ہو سکتی ہیں۔
.jpg)
یہ خبر سامنے آتے ہی عوام میں تشویش کی لہر دوڑ گئی، کیونکہ ملک میں پیٹرولیم مصنوعات کی قیمتوں میں مسلسل اضافے سے مہنگائی پہلے ہی کافی بڑھ چکی ہے۔ شہریوں کا کہنا ہے کہ اگر واقعی پیٹرول کی قیمت 280 روپے مقرر کی گئی تو اس کا براہ راست اثر روزمرہ زندگی، ٹرانسپورٹ کے کرایوں اور اشیائے ضروریہ کی قیمتوں پر پڑے گا۔
دوسری جانب سرکاری ذرائع اور متعلقہ حکام نے اس اطلاع کی تصدیق کرنے سے گریز کیا ہے۔ حکام کا کہنا ہے کہ ابھی تک ایسا کوئی سرکاری حکم جاری نہیں کیا گیا اور عوام غیر مصدقہ خبروں پر یقین نہ کریں۔ اس حوالے سے کوئی بھی حتمی فیصلہ یا اعلان متعلقہ سرکاری اداروں کے ذریعے ہی سامنے آئے گا۔